Námsferli

Orð af orði tekur mið af líkani um læsi á þremur stigum sem einnig má lýsa sem námsferli. ​
​
Grunnnám (surface literacy learning) felur í sér öflun grunnþekkingar og að tileinka sér vinnulag í slíku námi. Hér er um yfirborðsgerð læsis að ræða. 
Djúpnám  (deep literacy learning) felur í sér að öðlast dýpri eða sértækari skilning á efninu. Það felur einnig í sér að temja sér gagnrýna hugsun og námstækni sem stuðlar að djúpu námi. Hér er um djúpgerð læsis að ræða. 
​Yfirfærslunám (transfer literacy learning) felur í sér að nýta sér þekkingu sína til frekari merkingarsköpunar — að öðlast hæfni til að tengja saman ýmsa þætti þekkingar og endurbirta á nýjan, skapandi og greinandi hátt. Hér er um yfirfærslu- eða nýmyndunargerð læsis að ræða.

Á hverju stigi er ýmist lögð áhersla á að nota mismunandi aðferðir eða að nota aðferðir verkefnis á mismunandi hátt á hverju stigi eftir því sem við á.

Til þess að geta kafað djúpt í nám þarf að hafa yfirborðsþekkingu (skilning sem leiðir áfram) og til þess að hagnýta námið á greinandi og skapandi hátt (nýmyndun, yfirfærsla, umbreyting) þarf yfirleitt að hafa djúpan skilning á þeim forsendum sem maður hagnýtir sér.
​
Í stuttu máli má segja að nemendur verða fyrst að þróa með sér grunnskilning til að öðlast dýpri skilning og djúpur skilningur getur með ráðum og dáð stuðlað að hæfni til nýmyndunar.
​