Orð af orði
Orð af orði er kennslufræði sem hefur þann tilgang að efla læsi og námsárangur barna og ungmenna. Heitið sprettur af orðaleik þar sem „orðaforði“ er sundurgreint á frumlegan hátt í orð-af-orði.

Myndin fyrir ofan hefur þann tilgang að leggja áherslu á að nám er félagslegt og þegar nemendur vinna saman og ræða saman stuðlar það að betra valdi á orðaforða, orðræðu og því námsefni sem fengist er við.

Myndin til hliðar er tekin af kennurum á námskeiði um kennslufræðina, hér eru þeir að ná tökum á hugrænni kortagerð og munu í framhaldi af því kenna nemendum aðferðina stig af stigi þar til nemendur geta notað hana eða sambærilegar aðferðir á sjálfstæðan hátt og nýtt sér í námi.

Á næstu síðum er gerð grein fyrir kennslufræðinni, forsendum hennar, hugmyndafræði, aðferðum o.s.frv.

Allar myndir á vefnum eru teknar í skólum sem hafa tekið þátt í þróunarstarfi þar sem Orð af orði kennslufræðin er nýtt í þágu náms. Þróunarstarfið hefur verið kvikt og lifandi í meðförum skólanna og lærdómsríkt fyrir höfund kennslufræðinnar að fylgjast með nemendum og kennurum sem virkja hana.